Utstilling 2023
Solund Kunstlag arrangerar utstilling i Galleri Blink i tida 25.08.-10.09.2023.
Årets utstillarar er :
Anne-Britt Lerøy
Inger-Johanne Brautaset
Margrethe Barstad Golberg
Gro Aakenes Sævig
Alle er velkomne til opning av utstillinga fredag 25.august kl. 18.00.
Sundag 10.september kl.13.00-14.00 inviterar vi til kunstnarsamtale
med Inger-Johanne Brautaset.
Ho fortel om prosessen med bileta sine,
frå å lage eige papir frå botnen av ,til ferdige trykk.
Utstillinga og kunstnarsamtalen er open for alle og er gratisarrangement .
Sjå plakat for detaljerte opningstider.
Vel møtt!
OMTALE AV KUNSTNARANE
Anne-Britt Lerøy er grafikar og bileta er ganske nonfigurative, men gjev likevel assosiasjonar til vår verd. Linjene i ei kaldnålsradering vert rissa ned i ei plate med eit spist instrument av stål. Trykkinga av djuptrykk er svært komplisert og arbeidskrevjande. Teknikken har sine begrensingar og Anne-Britt held seg strengt til tradisjonen. Her er ingen innblanding av moderne teknologi, trykkeprosessen går sin gang med koparplate og sverte, presse og handemakt.
Inger-Johanne Brautaset er biletkunstnar og i prosessen med å skape nye bilete fordjupar ho seg i sjølve essensen av materiala sine, der teknikk og struktur har sin eigen kunstnarleg verdi og ibuande kraft med fleire lag av moglegheiter.
Kunstnaren er ein original tenkjar.
Inger-Johanne lagar sitt eige papir og har lært dette av eldgamle tradisjonar i aust. Inger-Johanne er svært oppteken av havets djup og kva mikroplast gjer med det som lever i havet. Interessa for økologi er noko som speglar bileta henna.
Margrethe Barstad Golberg er keramikar og fasinert av det skjøre, men samtidig sterke materialet. Ho er oppteken av forma, som ofte er klar og stram, noko som gjev spelerom for leik med fargar og dekorelement. Margrethe er svært oppteken av samspelet mellom form og dekor; korleis ein dekor kan vere ganske lik, men likevel skape eit ulikt uttrykk.
Margrethe lagar store krukker, fat, koppar og skåler.
Gro Aakenes Sævig er tekstilkunstnar. Ho har stor interesse for kunsthistorie og tekstil, og har kombinert desse to interessene med å lage klede i gode naturmaterialar med trykk inspirert av kunsthistoria. Gro ønskjer at trykka skal ha noko kjent frå kunsthistoria, samtidig som mønstera skal vere henna uttrykk – ofte i eit geometrisk mønster. Gro lagar mellom anna kjolar, skjørt og skjerf.
Alle kunstnarane held til i Bergen.
